كلمات كووول للشباب

 

هاااااااااااااااااااااااااااااااااااااااااي شباب


في جيلنا الحالي دا استجدت كلمات شبابيه جداويه بلمره لزيزه حبيتها بسراحة وسرنا بنتعامل بيها كتير


فحبيت اندرها المنتدى .. بس


أبو كلب -

ههههههههههههااااي .. وهادي الكلمة تنقال لما يكون في شي ما يعجبك ، يعني زي لما يكون جوالك قديم ومعدوم العافية تقول عليه جوال أبو كلب ، ولمن يكون قلمك ما بيكتب زي الأوادم ويقطع تقول قلم أبو كلب



- أشكل -

جات فترة انتشرت دي الكلمة بصورة كبيرة وهيا بشكل عام معناها الطناش ، فلمن تجي تبغى تطنش شي .. تقول أديه أشكل ، ومأخوذة من لعبة البلوت أو الورق للأخوان اللي ما يعرفوا معنى البلوت


- أطبعو -
ههههههههههههههاااي .. من الألفاظ المضحكة جداً وتنقال لمن الشخص ما يسمعك ويسأل إيش قلت ؟؟ وإنت مافيك تعيد الكلام تاني فتقولو أطبعو .........


- الـ ـ ـ ـ -

انتشرت بشكل رهيب إضافة أل التعريف من باب المبالغة في الفترة الأخيرة .. زي مثلاً لمن تشوف واحد غشيم تقول مو بس غشيم .. الغشيم ههههههه .. ولمن شباب يعاكسو في السوق ما يقولوا بنات .. البنات << ماراح يفهمها إلا أهل الحجاز وبصراحة لأنها تتنطق بطريقة مميزة .. << أموت في الطرق المميزة ههههههههه

- انبراش - نعرف إنو لمن تلعب كورة واحد يدخل عليك معناتها انبرش عليك .. لكن عند الشباب سار لها معنى تاني ، انبراشة سار معناها إنو دخلة غلط وسط الكلام ، يعني تكون إنت والشلة بتهرجوا في موضوع ويجي واحد يقول كلام مالو أي علاقة بالموضوع هنا نقول فلان انبرش .. وهادي تسير انبراشة .. ولا لمن يكون الكل ساكت ويجي واحد يقول كلام مالو اي داعي زي نكتة بايخة مثلاً هنا نقول على الحركة دي انبراشة

- بسط وهز وسط -

تخيلوا الفلم الهندي دا كلو عشان تجاوب على أحد يقولك كيف حالك
هههههههههههههههه أتحداكم تقولها عشرة مرات وبسرعة زي الصاروخ

- بلف -

هههههههااااااااي ، من أضحك المصطلحات بصراحة ، طبعاً الشباب يعرفوا البلوف : معناه إنو شخص ينبلف يعني يسوي الشي بسرعة بدون تفكير ، مثلاً لو شاف صاحبو اشترى سيارة جديدة وعجبتو قوام يجيب وحدة من نفس النوع .. هنا نقول إنو بلف ينبلف بسرعة هههههههههههههه .. وكمان لما يكونوا اتنين بيتضاربوا ويجي واحد يحرش نقولوا لا تبلف يعني لا تحرش .. ولا لما يكون واحد يجري بالكورة ولساعو بعيد عن المرمى ويجي واحد يقولو شووووت يقوم يشوت كدا بسرعة دا نقول عليه انبلف ههههههههههههههااااااي .. أحس بعض الناس ما حتفهمها بس هوا معناها كدا وخلاص

- تشبيك -

ودي الكلمة معروفة وانتشرت في مختلف أرجاء المعمورة .. ومعناها إنو لمن واحد يقول أنا شبكت فلانة يعني أنا خليتها تعجب فيا وتحبني .. ولا تكلمني وزي كدا

- تغريز - نعرف إنو التغريز للسيارة لمن تغرز في الرمل لكن بين الشباب المصطلح دا غير .. يعني لمن إنت تجي وتقول غرزت عند فلانة يعني وقعت في دباديبها هههههههههههه .. أو تقول فلانة غرزت عندي يعني وقعت في دباديبي
إيش بالله الكلام الفاضي دا ..

- - جنط - الكل يعرف جنوط السيارات طبعاً ، لكن اليومين دول سار برضو للجنط معنى تاني .. يعني لمن واحد يطفشك ويقرفك من كلامو يقولولك الشباب أعطيلو جنط يعني طناش ، وهادي ذكرناها فوق بمعنى أشكل

- دافور - دافور معناها زمان في الحجاز الفرن ، ولكن دحين سار معناها البنت أو الولد الشاطر/ة في الدراسة نقول عنه/ا دافور/ة
اللي دايماً شغال ع الكتب ولا يسيبها زي ما يسموه المصارية عثة كتب

- دعس -

دي الكلمة تنقال للإقدام على الشي ، وتنفع مرادف لكلمة قدام .. يعني لمن مثلاً يجي أحد يقولك تجي نروح التحلية ؟ ترد عليه وتقول والله دعس يعني ياللا معاك .. ولا هيا شباب نلعب كورة .. يقولوا دعس

- زي الكرتون -

تنقال للواحد الي مااااا يعرف يسوي شي في الحياة ومالو داعي

- شاكوش -

معناها الأصلي طبعاً المطرقة ، لكن دحين سار معناها البنت ولا الولد اللي مو حلو هههههههههه .. نقول عنو شاكوش

- شباب في رحلة -

وهيا مرادف لكلمة مشي حالك.. فلمن تعمل شي وما يطلع مرة مزبوط تقول للي جنبك ياخي عادي شباب في رحلة ههههههههههههههه من فين جات هادي الله أعلم
ولا تسوي شي مو معتاد كدا وتحس إنو في أحد أستغرب فتقولو شباب في رحلة ياخي

- شوربة -
طبعاً كلنا نعرف الشوربة أحلى شي عندنا هنا شوربة الحب على الفطور يا سلام سلم
لكن هنا معناها غير .. فلمن إنتا تقول شوربة يعني شي سهل ، فلمن مثلاً يكون عندك اختبار ويكون سهل مرة تقول الاختبار كان شوربة وكدا
ولا مثلاً تكلم أحد وتقولو أنا أروح شوربة .. يعني أروح وطي هههههههههههههه
ولا تجي المدام تجيبلك الأكل تقوم تقولها حياتي من غيرك شوربة << كأنو إعلان

- صاروخ -

ههههههههههههه طبعاً نعرف الصواريخ .. ولكن هنا معناها شي تاني .. معناها البنت الحلوة فلمن الأولاد يشوفوا بنت حلوة يقولوا عنها صاروخ

- طقطقة -

ودي الكلمة تنقال لمن تبغى تتسلى في واحد ، يعني تستعبط عليه وهوا أهبل يكون مسكين على نياتو فالشباب لو كانوا متجمعين مثلاً يقولوا جا فلان نطقطق عليه ولا تلاقي واحد يجي يقول أمس طقطقنا على راس فلان وزي كدا

- في الألف ولا في المليون -

دي حلوه مره وهيا لمن تشوف شي يعجبك ويكون مميز مافي زيو يعني أو تعمل حركه مميزة أو شي زي كدا لنفرض مثلاً جوال عجبك تقول والله جوال في الألف أو تقول جوال في المليون

- ما عندك احد -

هههاي كلمه فله ولمن مايكون عندك هرجة وتنقال للشي اللي مو تمام

- نمرة واستمارة -
ودي تنقال عند التأكيد وغالباً في االهبالة زي مثلا تقول فلان أهـ.... بنمرة واستمارة

- كاااااي -

وهادي هيا ضحكة الشباب الجديدة ويضحكوها وقت التريقة والشماتة و لا دحين
سار الضحك تقول كاااااي بصوت عالي وتمد الألف

- هبقة -

هبقة زمان أعتقد كان معناها سرقة لكن دحين اتغير المعنى فلمن تقول مثلاً والله هبقت أنا والشباب ورحنا الكباين مثلاً فهبقة هنا معناها طلعة وليها معنى تاني بمعنى هروب زي لمن طالب يقول أمس هبقت من المدرسة يعني شردت منها أو تسوي حاجة غريبة على حركاتك انتا تقول ياعمي هبقة

- يعطيييييك -

دي الكلمة من الكلمات الجديدة وتنقال للتشجيع يعني لمن تلاقي أحد عامل حاجة رهيبة تقوله يعطيييييييييك بمد الياء التانية زي مثلاً يكون سجل قول ولا شي زي كدا

- أرنب .. ركبتي -
من الكلمات اللي تدل إني أنا بسمي بكشة قدامي ، فيعني قلك بيسوا إنهم محترمين ومايبغو يقولوا للي قدامهم إنو كداب يقوموا يقولولوا كدا يعني زي واحد قاعد يتكلم ويحكي وكل كلامو بكش يقوم واحد يقول للتاني يووواد شوف شوف أرانب

- يلعن أم الفله لمن يكون في شباب وعجبتهم مره الطلعة ولا في أاولاد يبسطوا الواحد يقوموا يقولوا على الطلعة مثلاً يلعن أم الفله

- أمّووو -

يعني مثلاً مين فين لأمو حلو .. يابن الناس سيب أمو في حالها هيا إشلها صلاح

- فُكّنا -

يعني تكون مافيك و واصلة معاك على النهاية .. وأحد مطفشك تقولوا ياشيخ فُكّنا

- فُكّها -

هههههههههههاي هادي المرة هوا حيفكها ، لمن الواحد تكون أخلاقو واصله حها طين تقولو ياشيخاص فُكّها

- قوية -

لمن يسير شي مو عاجبك ولا شي كدا مو زي الناس .. تقول قويييييييييييييييييية بشد الياء

- خرّييييش -

دي الكلمة لمن تكون جالس بين الشباب ويجيك واحد يجلس يكدب ويلفق في الحكاية ويملح فيها تقوم تقول خرّييييييش

- كووول - وتنقال على أي شي يعجبهم ..

- جييييّييييد -



بشد الياء .. لمن يعجبك الشي الكول تقول عليه جيييّيييد
- باااااد - لمن تشوف شي مو حلو ولا ولد منظرو سيء تقول عليه بااااد .. بمد الألف

- هيّااا خيــــر -

.. لما يسير شي مفاجئ ولا يكون في حاجة غريبة كدا .. ولا بسوي نفسي مستغرب ولا بستهبل إني مو مستوعب فعلى طول هيّااا خيـــــــر

- كل فطير وطير -

يعني ياللا روح سرّي راحت عليك خلاص

- انشكاح -

ومعناها يعني لمن الواحد يسمع خبر حلو ولا عندو خرجة مرة خطيرة وفيها فله تلاقي طاير من الفرح ومين قدو .. تلاقيه منشكح .. فتقولوا بطل انشكاح



- لا تدف -

كلمة حلوة وتنقال لمن تكون بتتكلم ومتحمس في الهرجة ومتفاعل في كلامك وبتأشر بيدك كدا وتطلع فيها وتنزل .. فأقولك لا تدف .. ولا لو واحد معصب وبيهزئ في الكلام ولا كدا يقول يللا بسرعة سوي كدا دحين .. تقوم تقولو طيب لا تدف

- زرقنة -


هههههههههههههههههههه كلمة جييّييدة .. واحد مخو ناشف يعني لو تقعد تقولو وتشرحلو وتترجى وهوا مُصِر كدا يعني كدا .. فهادا يكون مزرقن بقوة

- قردنة -



هادي غالباً ما تنقال على الناس اللي مزرقنين ، مثلاً تبغى تخرج وأبوك مُصِر إنك اليوم معاقب مافي خروج ، على طول يقولك صاحبك ياشيخ روح قردنو ، يعني روح جيب راسو .. مو تجيب راسو يعني تروح تقتل الرجال وتجيب راسو ههههههههههههههه

لا لا يعني تجيب الموافقة ويقول طيب




- أخرشها -



يعني أصرفها .. ههههههههههههه كلمة حلوة.. عندك كدا كدبة ومنتا عارف تكدبها وخايف وعامل الولد اللي عمرو ما يكدب وإنت دحين في ورطة ولازم تكدب يقوم صاحبك يقولك ياشيخ خلاص أخرشها ولا أصرفها

ولا سويت مصيبة وتبغى نلف الموضوع فتبدأ تفكر كيف تخرشها ولا تصرفها



- نص كُم -

حركات النص كُم دي بطلوها .. تقعد تعملي إنك ولد كووول وفي النهاية إيش تبغى !! قول كدا من الأخير .. عندك شي تبغاه مصلحة تبغاها قول لكن لا تقعد تدّحلس عندي وتعمل حركات النص كُم



-خفة -


ودا اسوب للتريقه انو ياي انت مره دمك خيف وهو بيقصد العكس


_ بيض _
ودي على الحاجة الي مي عاجباهم يعني يؤؤ اليوم مني حاب اخر الجو مره بيض



دا الموضوع جاني برساله على الايميل وانا اضفتلوو بعض الكلمات

للأمانه يعني

تحياتي


سي يوو

 

 

الموضووووووع مرى نايس وحلو
في كلمات انا كمان بضيفها ممكن

آهـ آهـ
الكلمه دي تنقال لمن تشوف شي يعجبك وتقول مثلا يواد البنت دي مرآ اهـ
او انك تشوق هجمه حلوه في مباراة تقول الهجمه دي مرا أه


كترمنها
الكلمه دي معرووفه انها بلا كدب ياكداب


حل سري

يعني فارقني ابعد عن سمايا


انتا كيف

هادي الكلمه نقولها مثلا لمن نكون في بحر وفله وضحك ويجيك واحد نكدي البعيد يقول هرجه مالها داعي ويقلب الجو نكد نقولو يواد انتا كيف؟

هيا كلم
الكلمه دي نقولها لمن نتكلم في موضوع مرأ حماس يجي وواحد يغير الهرجه ولا يدخل غلط ولا يقول شي مالو في الموضوع نقولو هيا كلم يعني شوف
الدخله الغلط

انتا مين انتا
هادي نقولها لمن يجي واحد يمزح ويقول مثلا ياواد تعلب معايا اكسر راسك في البلاي ستيشين نقولو يواد انتا مين انتا حل لمن تكبر تعال <= أسلوب تحقير ههههههههه

بس خلاص يسلمووووووو على الموضوع يا نونه

تشـــآآآو

 

 

والله كلمااات مرررره كووول ..

تسلمي ميس نونه وتسلم جداوي وسنكرس ع الأضافــه ..

<< بجي كل شوية اشوف مين ضــاف كلمات جديد هههههههه ..