قصة حقيقية في حياتي

**Meroziz** · 21st July 2010

طبعا أنا كتبت هذا العنوان المحمس عشان تشوفو إيش هي لكن هي قصة وفاة الوالد الله يرحمه واللي كانت من أربع سنوات طيب يلا نبدأ : بسم الله الرحمن الرحيم أبويا الله يرحمه كان مدخن وكان يدخن نوع مرة ثقيل مارلبورو أحمر وكانت تجيه جلطات وحاجات كدة من الدخان وهو لسا في الأربعينات وحاول مع الدخان وبطلو لمدة سنتين وبعدين انفصل عن أمي ومن يومها رجع للدخان مرة ثانية وكانت الأخس المهم بدأ العام الدراسي الجديد اللي أنا كنت رايح في الصف الثالث المتوسط وفعلا رحنا اليوم الأول وودانا اليوم الثاني بس ما جاء عشان ياخذنا وأصحابو في العمل ما كانو راضيين يعلمونا إيش فيه فروحنا عالبيت وبعدها بمدة دق علينا واحد وقلنا إنو الوالد بالمستشفى لأنو كان قايم يصلي العصر وهو واقف عالسجادة وقبل ما يصلي طاح عالأرض مغمى عليه ودوه المستشفى وهو في الطريق قالو إنو فاق ورفع إصبعو واتشهد ولمن دخل العناية المركزة بمستشفى العلوي التونسي كشفو عليه ووجدو هو زمان كان عندو جلطة في المخ والدم في الجلطة يكون متحجر وكان يتعاجل منها بمسيلات للدم فهذي المسيلات أدت هي والضغوط اللي عليه في العمل أدت إلى زيادة في تدفق الدم مما أدى إلى إنفجار شريان في المخ وتسرب كمية كبيرة من الدم للمخ المهم إنو المستشفى الخاصة واللي هو كان فيها بمكة وهي ( متشفى علوي تونسي ) ما كان فيها أخصائي مخ وأعصاب وهي مستشفى كاملة ومتكاملة وما فيها برضو المهم جبنا سيارة من مستشفى ثانية ونقلناه عليها كان فيه أخصائي مخ وأعصاب وقلنا إنو حالته مرة متأخرة بس إن شاء الله يسير خير بس قالنا إنولو عاش هيكون عندو شلل نصفي فهو الدكتور بعد أسوع تقريبا من وجوده في العناية المركزة كان حاطينله مخدر عشان يبقى نايم طول الوقت وما تصير له مضاعفات وشال الدكتور المخدر وبعد ما كانت الحالة بتتحسن بدأت تزيد ويزيد الدم في المخ لين ما انتشر في المخ كله وقالولنا الدكاترة ادعولو والدكم اتوفا دماغيا يعني الدم ملأ مخه تماما فالمخ ما صار شي لأنو زي الاسفنج امتلى بالدم لين حد معين بعد كده خلاص فقد تحكمو على جميع أجزاء الجسم تماما طبعا رجعنا البيت كلنا جالسين نبكي وندعيلو خلاص الدكتور مهدلنا إنو قدامه كم يوم ويتوفا إضافة إلى أنو كان بيتنفس بالأجهزة اللي راكبة عليه مو بنفسو يعني لو شالوها يموت على طول وكانت بنت عمتي دايما معاه في المستشفى وتقرا قران وكده لين في يوم من الأيام وأنا رايح المدرسة الصباح شفت أمي جالسة وكذا وطالعتلي بنظرة وأنا طالع من الباب ما فهمتها إلا بعد ما جاني واحد من أصحاب أبويا وأنا في المدرسة وأخذني منها وقلي البقاء لله والدك اتوفى طبعا أنا ما كنت مصدق لمدة وجلست ساكت كده مدة وبعدين طبعا معروف اللي هيصير الكثير والكثير من البكاء وبعدين دفناه وخلاص وقام واحد صاحبه حكانا حكاية حنا ما كنا نعرفها ابويا كان في يوم من الايام بيودي صاحبه ده البيت وهو مديره تخيلو أبويا وهو المدير بيوصل موظف عنده البيت الله يرحمك بيت الرجال كان قريب من المقابر فقاله يا سعيد انت تسلم عالناس اللي في المقابر ولا لا ؟ قام زميله سعيد قاله لا والله يا مستر قام أبويا قاله من اليوم يا سعيد لازم تسلم عليهم على طول وبس وطبعا هذي القصة لمن سمعناها ما حد فينا قدر يتمالك نفسه ولا حتى صاحبه وهو بيحكيها ولكن سبحان الله رب ضرة نافعة وفعلا ما أخذ الله منك إلا ليعطيك قبل ما يتوفا الله يرحمو حياتنا ما كانت مستقرة لأنو كان هو وأمي منفصلين بس عادي يعني كنا خلاص اتعودنا على الوضع لكن دحين اصغر اعمامي وهو في عمر امي تقريبا اتزوجهاعايشين حياة مستقرة في فلة جدتي والحمد لله عمي هذا غير حياتنا تماما انا كنت في ثالثة متوسط لمن أبويا اتوفى ودحين انا رايح الجامعة وهو ان شاء الله مبسوط لاني الحمد لله من يوم ما دخلت الثانوية ونسبتي ما نزلت عن 99 وجبت في القدرات من المرة الأولى 88 وفي التحصيلي 92 وعايشين مبسوطين وتمام الحمد لله بفضل وجهد أبويا وأمي وعمي فيا جماعة ربنا ما ياخذ منك شي الا يعطيك اشياء كثير احسن وفي النهاية حنا اصلا كلنا اموات بنمشي عالأرض لأنو كلنا هنموت أتمنى تاخذو عظة وعبرة من حاجات كثير وأتمنى إني ما أكون بكيت أحد زي ما أنا سويت وأنا بكتب التوبيك ههههههههههه لأنو ده أبويا ولو أذكرت شي واحد حاو منو بس ولو بعد مليون سنة الطبيعي اني رح ابكي بس وخلاص انتهت القصة

الله يرحمك نستنى لقاك في الجنة إن شاء الله يا غالي